Sejarah Partangiangan Nababan 13 Oktober 1955

Mauliate ma di angka Natua-tua sian sundut naparjoloi, na patomu-tomu DOS NI ROHA, mamilang-milangi, pamanathon, mamparungkilhon sitaonon na masa, songon di Pomparan ni MARGA NABABAN, BORU, BERE, IBEBERE. Jala mangalului jalan keluar na gabe songon Pangondian ima :

1.  Pamanathon Pangalaho / Impola ni holong ni roha
2.  Pamanathon angka ragam ni sibonsir i na masa i 
3.  Mangantusi, na masa i songon sitaonon ni sude / sada sitaonon
4. Asa masiantoan di bagasan tanggung jawab na sintong
5. Pasadahon pangantusion di lapatan dohot di gogo ni tangiang na mangolu tu Debata, ima songon haluaon na boi paruarhon MARGA NABABAN ,BORU, BERE, IBEBERE sian parungkilon
6. Asa sian DOS NI ROHA dohot TAHI na mansai denggan, dipatupa PARTANGIANGAN I, di Siborong-borong, Tapanuli Utara Sumatera Utara di Tanggal 13 Oktober 1955 na salpu.

SEJARAH NI PARTANGIANGAN I TARHIRA SONGON ON MA :

Dung tangkas angka pangantusion i di angka natua-tua sundut naparjolo, dipanghorhon ni pangonai ni sitaonon i, ima naung pola sahat tu pangalaho na mandele, diuji angka natua-tua ma mangadopi namasa. Ima mamingkirhon aha ma si eahan laho PASADAHON, PADOMUHON, angka NA MASIHAHOLONGAN, manangkasi jala mamparungkilhon sude parngoluon i, isara ni PANGALAHO, HAGABEON, HAMAJUON, HAMORAON, dohot lan dope tahe.

1.    Pangalaho na lam so ture, mamboan Marga Nababan tu ngolu Parsirangon, Parbolatan, Hosom dohot tu Dosa namansai jorbut, Holong i nungga lam so paltak be jala nunga tung sanga sobu jala jorbut hian ianggo hosomi di parsirangan ni par Haha Maranggion, ima naung sanga adong Nababan Dolok dohot Nababan Toruan.

2.   Taringot tu Parpinomparon tung mansai na hansit do. Jala songon Tarombona songon on ma.  Opat Ompunta Borsak Mangatasi namarhaha maranggi (Anak ni Toga Sihombing) ima :

v   BORSAK JUNJUNGAN ( SILABAN ),

v   BORSAK SIRUMONGGUR ( LUMBAN TORUAN ),

v   BORSAK MANGATASI ( NABABAN ),

v   BORSAK BIMBINAN ( HUTASOIT ).

Ia anak ni Omputta BORSAK MANGATASI Opat hali Holan Anak sasada ima : SIANTAR JULU, Anak nama SIANTAR JAE, Anak Siantar Jae ima TUAN SI SOGO SOGO, jala anak ni TUAN SISOGO SOGO ima OMPU DOMI RAJA, asa dung pe sian OMPUNTA DOMI RAJA asa adong anak na dua ima : SANDAR NAGODANG dohot TUAN SIRUMONGGUR, jala nadua on ma manorushon Tarombo ni NABABAN sahat tu sadarion. Jala molo tapaihut-ihut pardalanan ni parpinomparon i, tung mansai godang do idaon panghorhon ni pangalaho na mansai jorbut i. Ima patunda ni angka dosa i, ima naso rap ris di hagabeon i. Atik pe naung adong marnomor 24, alai mangolu dope na marnomor 14. Jala atik pe anggi ni partubu, alai nunga sude be marompung tusi.

3.       Taringot tu parngoluon ( Taraf Hidup ).                                                              
Tung pardosdosan do anggo hapogoson i, ai tung adong sada –sada naboi mangan, ndada tardok dopei/ tarpatudos tu angka ngoluni namaduma.Umum na martani do / mangula tu balian, jala hinorhon ni namarsiguluti di angka parbalohan, masisoluhan, sialani angka parbagianan, alani ma godang lalap masielatan, hosom jala godang na bungkas sian Bona Pasogit tu angka luat naasing, marserak mamboan hosom, mangguruhon hadatuon/ habeguon songon modal mampartahanhon ngolu. Tarombo ipe ndang ringkot bei ai holan patubu hansit ni roha namai jala pasunggul-sunggul hinadangol, alani do umbaen naso pola hantus sipata nang angka Taromboi pe di torop pomparan ni omputta.

 4.   Taringot tu Hapistaran/Hamajuon/Hasangapon.                                                                Tung  mansai namaol   doi dapot, ima   ala panosak  ni  hapogoson ni, ai tung  soadong be   laho roha pasingkolahon  Ianakhon, alai anggo   marguru Hadatuon  dohot    Ulaon Haholomon i tung  mansai ringkot  doi, laho manjamothon  serangan sian duru dohot sian   bagasan / pardongan tubuon.   Molo  pe tung  adong  sada-sada  na berjiwa maju, na olo    marungkil    pasingkolahon  angka   Ianakhonna,  ba hira - hira naeng dapot  sa  na   niluluanna,  sai  manigor mate  maon  poso.  Molo  tapamanat  tahe sundut angka na parjoloi  nunga be  tung garang  parrohaon i, hagogoon, balgani botohon, teal, late, hosom inama tujuan, atik pe  naung ro Ha Kristenon, tung   hira  so parduli  do idaon, ndang  adong biar na tu angka sapata / dosa. Tung godang do tahe naso tarpaboa-boa taringot tu pangalaho naung sanga segai, gari sundut Naumposo nungnga hira pangkat tahe molo didok SI NABABAN PANGEMOR, MANANG SI PITU ARU-ARU, BANDIT BUTAR ai SAE DO UTANG MOLO DUNG DI BOAN JAGAL GODANG  (Juhut balga/godang).

5.     Haporseaon, tardok ma hira SIPELEBEGU dope angka Ompunta naparjolo i. Atik pe nunga ro Barita Nauli,tung mansai bangkol do nasida olo Porsea, jala molo dijalo nasida Barita Nauli i, ndang apala manigor marlapatan di ngoluna, ai tung sohot dope haporseaon habatahon i, jala idope anggo tung namangula. Jala molo tung adong idaon martumbur holongi, datung sian panghorhon ni Barita Nauli dope, alai holong parmudaron dope.

    

6.     Dung tangkas saluhut angka namasa i di pangantusion ni angka natua-tua na parjolo, dihilala ma tung mansai porlu situtu patupahon sada usaha tudos ni roha ima na mangeahi hasadaon di NA MARHAHA-MARANGGI, DI NAMARBORU, DOHOT DI IANAKHON, sian dos ni roha ni angka natua-tua, dipatupa ma Ulaon PARTANGIANGAN i, di ari 13 Oktober 1955 di Siborong-borong. Ima laho mangido pasu-pasu tu sude Raja ni dongan Tubu, Hula-hula, Raja naliat nalolo, tarlumobi ma tu Jolo ni Debata. Asa tung dilehon pasu-pasu marhite-hite angka tangiang ni angka Raja, nang angka Parhalado ni Huria. Dibagasan elek-elek dohot ilu-ilu Pomparan ni BORSAK MANGATASI, ANAK, BORU, BERE, IBEBERE mangido tu jolo ni Tuhan Pardenggan Basai, ragam ni Pasu-pasu Na i. Dung denggan singkop marsipanganon, jala sahat angka parjambaran, denggan tu hasahatanna, denggan mardalan ulaon i, mardame ma sude, ndang hasurahan.ojahan ni Partangiangan i, ima Psalm. 133:1-3. Tung denggan situtu do diida Si Jabu-jabu tangiang on, di tangiang na songon ojahan di hasadaon dohot hadameon. Jala Si Jabu-jabu on do na tardok pelopor di hasasaut ni Partangiangan ni Nababan i. Disosohon do di siganup taon dipatupa partangiangan si songon i, di lunggu huta, nang pe marsasahalak. Ima di ganup tanggal 13 Oktober ganup taon, sian dos ni roha di tonahon do tu sude.

     Tona tu Pomparan ni Borsak Mangatasi Nababan:

1. Asa mangula dibagasan ngolu na MAR TUHAN
2. Asa unang be adong na mandok, NABABAN DOLOK dohot NABABAN TORUAN
3. Asa unang adong na mangasahon GOGO, HUASO, SINADONGAN, LATE, TEAL ,ELAT nang HOSOM
4. Asa MARSIURUPAN jala MARSITOGU-TOGUAN
5. Asa Martutur hombar tu Tarombo i.

 Di Taon 1980 di patupa Ulang Taon Partangiangan di Siborong-borong, ima Jubeleum na 25 taonhon. Dipesanhon do asa MARHASEREPON, MARTORUK NI ROHA, BURJU MARTANGIANG jala MARROHA MAULIATE tu DEBATA NABASAI. Dibilangi do disi torop ni Nababan, Boru, Bere, Ibebere, na martitel nang na marsingkola na timbo, nunga be tung torop nian. Jala di taon 1991 di patupa do PARRIAAN ni NABABAN, BORU, BERE, IBEBERE di Jetun Silangit Siborong-borong.

Hasil ni parriaan i ima:

1. Asa Marojahan di Poda Partangiangan taon 1955, sude rumang ni parsadaan ni NABABAN
2. Patupa Program Jangka Pendek, menengah/panjang di sude panggulmiton ni parngoluan laho tu hamajuon. Ima ulaon ni Pangurus Harian, Pusat, Daerah di sandok Portibion
3. Pahantushon Tarombo / Paradaton
4. Ditolopi do LOGO ni NABABAN songon on :
   

 

          Hatorangan ni Logo i, songonon ma :

*    1 Pohon Baringin : Sada do Nababan

*    1 Bintang : Mar Tuhan

*    10 Laras Sinar : Bulan 10 (Oktober)

*    13 Akar Tunjang : Ari 13 (Tanggal 13)

*    2 Akar : Dua Anak ni Borsak Mangatasi ima Sandar Nagodang dohot Tuan Sirumonggur.

*    55 Gulungan Daun : Taon 1955.

*   4 Buhu di Batang Beringin : Opat Hali Anak Sasada ima : SIANTAR JULU, SIANTAR JAE,

    TUAN SISOGO-SOGO dohot OMPU DOMI RAJA

*    Di ihot Segitiga : Dalihan Natolu

Songonima sejarah ni Partangiangan Borsak Mangatasi Nababan, napinapungu-pungu sian beberapa sumber terutama : Amang St. J. Nababan /br Hutajulu ( 16 ) di Bagan Batu Riau (Ketua Nababan Bagan Batu sekitarnya). Molo adong na hurang lobi mohon dimaafkan, hami pe paima masukan perihal Sejarah Partangiangan on, asa lam tu denggan na.

ditulis oleh : St. Samuel Manalu.BSc / br Nababan ( 17 ) 

diedit oleh  : Sinta AS Nababan (20)